Wer bastelt mit?

Olso, weing mein Adveintkraunz warads. I wü eich amol zoagm, wia ma dein so mocht. Sou schwa is dea goa ned zan dabasltn. Im Prinzip is eh uafoch, owa ned unanstrengand. Basismatrial dafia gibt’s in jedn gscheitn Kölla, do steht jo eh imma a sou a gstieglts oda gössriges Herrenhoundtascherl umatum. Und a poa Kiazn waradn a praktisch. Meist gfindtn si dei in da Speis irgendwou gaunz hintn. Im bestn Foll nimmt ma holt via Stuck. Wos nou ned föhln deaf: A Flouschnöffna.
Sou, haiz kaun los geihn: Erschte Floschn außa neihma vam Houpfn-Sechszylinda und aufmocha. Und daun kimmp a scha da gmiatliche Tol von da Gschicht:
Austringa!
Mit der zweitn Floschn vafoahst grod a sou. Ba da viatn und da drittn is ned vüh aundascht. Sodala. Hiaz san owa nou zwoa Floschn drinna. Najo, wos sull’s, dei kean a aussa. Und wenn mas scho in da Haund hot, trinkt mas aus a glei. Späitastns hiaz sulltat ma Soa geihn, sist wird da näxte Schritt epa goa haari. Wal hiaz keima di Kiazn ins Spü. Dei muissn nämli fein säuberlich aun di davia viagsegnan Steickplätz brocht wen. Und deis is hiaz niamma sou leicht, wia ma si deis zeascht viagstöult hät. Waun ma di Wachsttrimma unfollfrei plotziert hot, kau ma si stulz hiseitzn und a bissl nofizn.
Owa ned zlaung, wal di Nochbarin hot a uan bstöut.